படித்ததில் பிடித்தது – 17 [நம் காதல்]

படித்ததில் பிடித்தது – 17 [நம் காதல்]

நம் காதல்

நம் காதல்

உன் பெயர் தாங்கிய அழைப்பிதழ் சொல்லும்
நாளை உன் திருமணம் என்று.
எப்போதும் போல் ஒரு மெல்லிய பரவசம்
பரவி மறையும் உன் பெயர் கண்டதும்..
பிரிந்ததன் காரணங்கள் இனியெதற்கு?
சேர்ந்திருந்த நாட்கள் கவிதைகள்..!!

எப்படிச்சொன்னாய் காதலை என்ற
நினைவுண்டா உனக்கு?
இருநாட்கள் பேசாதிருந்து.
அந்த மௌனம் சேர்த்தது உன்னையும் என்னையும்..!

எனக்கான வாழ்க்கை பிறகு நான் வாழ்ந்தேன்.
உனக்கென சமையல் கற்று,
உனக்குப்பிடித்த நிறத்தில் உடுத்தி,
உன் காய்ச்சலுக்கு கண்ணீர் விட்டு,
காணும் கடவுளிடமெல்லாம்
உனக்கென அர்ச்சித்து
காதல் பூஜித்தேன்.

நீயும் கொண்டிருப்பாய்
இதைவிட அழகானதொரு தொகுப்பு.
உன்னில் நானும் என்னில் நீயும்
எப்போதும் நலம் விரும்புவோமெனில்
எப்படி தோற்றதாகும்
நம் காதல்?

ஆயிரம் பேசினாலும்
விட்டத்தைப்பார்த்து அழுகையில்
காதடையும் கண்ணீர்
குறுகுறுக்கும் நம் காதல் போலவே…!!

— சொரூபா